منتديات شبكة حياة - يلا نخس قبل رمضان

طبعا زى ما باين من العنوان عايزة أخس قبل رمضان و طبعا عندى أسبابى .

بس تيجوا نخس بنية ان صحتنا تتحسن و نقدر نزود فى العبادات يعنى مثلا نصلى النوافل و صلاة التراويح من غير ما نحس ان جسمنا تقيل و ان الحركة صعبة و مرهقة
وكمان علشان الصيام يبقى أسهل
ياه كل ده هيبقى سهل لما نخس شوية
لأ ده فى الأكتر من كده متيجوا نزود نوايا كمان
هتحافظى على صحتك اللى هية أمانة ربنا سايبهالك

مش هتتعبى من شغل البيت و طلبات جوزك و ولادك بالعكس هتبقى سهلة عليكى يعنى هترضى ربنا و تراعيه فى بيتك

نفسيتك هتتحسن

هتبقى أجمل فى عنيكى و عين جوزك (و طبعا هتتحسن علاقتك مع زوجك) يعنى هترضى زوجك و ده طبعا معناه ان ربنا هيرضى عليكى

شكلك هيبقى أصغر من سنك الحقيقى (يعنى هترجعى كام سنة لورا)
و ده هيخليكى تزودى فى العطاء لكل من حولك و تساعدى اللى محتاج منك أى مساعدة(يعنى هتكسبى ثواب لكل عمل خير بنية صافية هتعمليه)

هتقدرى تنزلى وتطلعى بسهولة (لأنك هتبقى خفيفة و حركتك سهلة)و ده طبعا هيديكى فرصة لزيارة أهلك و أقاربك(يعنى هتصلى رحمك)

وطبعا لو كنتى بتشتغلى هتبقى نشيطة و أدائك أحسن (يعنى هتخلصى فى شغلك و تحللى مرتبك علشان ربنا يباركلك فى الفلوس)

كل ده و أكيد فى حاجات تانية كتير تخلينا نخس عموما و قبل رمضان خصوصا علشان نقدر على العبادات

يلا مين هتيجى معايا نخس قبل رمضان
اللى عايزة يا ريت تكون جادة جدا علشان نشجع بعض
وتدخل تقول يومياتها
مش مهم طريقة الرجيم المهم انك دايما تكونى بتاكلى اكل صحى علشان صحتنا متتعبش و تخلصى النية لوجه الله سبحانه و تعالى علشان ربنا يكرمنا
طبعا متنسيش تقولى وزنك و طولك علشان نتابع مع بعض