منتديات شبكة حياة - ماطاح من عيني رجل طاحوا رجال

إن كنت تنشد يارفيقي عـن الحـال
مالـي علـى كتمانهـا عنـك حيلـه

الصبر عن بـوح الاحاسيـس قتـال
والبوح في بعض المواقف فشيلـه

لو كل مايطري علـى البال ينقال
ماكان شفت ان الثقيله ثقيله

ابطيت اكافح ضيقة البال بالبال
وادفع بلا هوجاسها كل ليله

لين اقبلت مثل السحابة بهمّال
تشفي غليل اللي تزايد غليله

رعادها خيلن تدابك وتختال
وبراقها لمع السيوف الصقيله

طاحت ولاْوفق من حناياك منزال
وسع فضى صدرك لفيض المخيله

ان قيل ترعد قل لهم صوت زلزال
وان قيل تبرق شف لها ادناة حيله

مابي تناقلها هل القيل والقال
وتصير من بعد القصيره طويله

يافهد ماني عال لو صحتي عال
شفني من الصدمات نفسي عليله

اشيل حملٍ لو يشيلنه جبال
الله وامانه غير تصبح نثيله

أرمي من هموم الزمن واسحب ادبال
وانزل عن (..الجوكر..) وغير يشيله

من كثر ماشفت بحياتي من انذال
بديت اشك ان النذاله فضيله