اشطر قارئة فنجان فى مصر

[يادى النور]

اشطر قارئة فنجان فى مصر

الموضوع ده جه على بالى النهارده لما قعدت مع شويه مثقفات خريجات جامعات ولقيتهم عمالين يسألو بلهفة عن واحدة بتعرف تقرأ الفنجان كويس
استغربت قوى
وسألت طيب عاوزينها ليه؟
واحده منهم قالتلى عاوزة اعرف ( )هيخطبنى ولا لالالالالالالالالالالاء
قاطعتها التانيه بسرعه وقالت اه والله وانا عاوزة اعرف الواد(..........)بيحبنى انا ولا بيحب البت الرخمة دى (........)
وواحدة قالتلى انا عاوزة اعرف معمولى عمل ولا لاء اصل كل ما يجينى عريس يطفش تانى مش عارفة ليه
الرابعة بقى قالتلى وانا هموت وأعرف (...........) هيرجعلى ولا لالاء
قلتلهم على فكرة هظاركو بايخ قوى والجو مش مستحمل تقل دم
ردت واحدة فيهم على وقالتلى احنا بنتكلم جد انتى مش مصدقه ولا بتستعبطى تلاقيكى ياختى اول واحدة بتروح ومن غير ما ارد عليها بولا كلمه قلتلهم هاحكيلم حكايه حصلتلى.
وانا فى ثانوى اتعرفت على بنت فى المدرسه كانت قمه فى الاخلاق وفى مرة اتفقنا وانا راجعة من الدرس هعدى عليها فى بيت خالتها آخدها وننزل وبالفعل عديت عليها انا وبنت خالتى دخلنا قعدنا وعرفنا ان صاحبه البيت دى هى وجوزها بيعالجو بالقرآن وتداوى بالاعشاب
المهم واحنا قاعدين الباب خبط وفضل يخبط ويخبط وصاحبه البيت تبص من العين السحريه وتسكت وبرضه الباب يخبط وقالت لنا اللى على الباب دى واحده من اكبر قارئى الفنجان وانا مش عاوزة ادخلها بس فى النهايه مع الالحاح فتحت ودخلت
شافتنى انا وبنت خالتى ومن نفسها قامت باصة فى عنيه وقالتلى انتى عنيده قوى ولما بتزعلى بتتخنقى قلتلها ايوه قالتلى انتى هيجيلك اخر الشهر ده عريس جارك وهتتخطبيله وهتنجحى السنه دى وخدى بالك فى حد عاوز يغتصبك وبيراقبك فى الرايحة والجايه وهيغتصبك وواحد صاحبه هيشوف اللى حصل ويجوزك علشان يستر عليكى لانه بيحبك من الاول
فضلت اعيط
بنت خالتى قالت لها وانا قالت لها انتى بتحبى واحد الواحد ده بتحبه واحده صاحبتك ومن دمه بس عمره ما هييجى يخطبك بنت خالتى قامت معيطه قالت لها ازاى ده كلم ماما قالت لها ابقى تعالى وتفى فى وشى لو حتى خطبك ده عمره ما هيكون من نصيبك وعلى فكرة مش هتنجحى السنه دى
المهم انا عشت فى رعب وبنت خالتى فى نكد
لانها اول مرة تشوفنا وكمان هى من بلد تانيه خاااااالص وبعيدة عننا
المهم اوزة اقولكو:انى مفيش عريس جالى فى الشهر ده والشخص اللى قالتلى عليه ده كان بيحب واحده جارتنا وصاحبتى تانى حاجة انا اتجوزت واحد من بره البلد خاااااااااااااالص والحمد لله خلفت بنت وولد ومفيش حد اغتصبنى
بنت خالتى بقى هى صحيح جابت ملحق فى ثانوى بس نجحت فيه ودخلت معهد واتجوزت وخلفت دلوقتى ما شاء الله ولدين عارقين اتجوزت مين؟؟؟؟؟؟؟؟؟؟
الراجل اللى قالتلها عليه ابقى تعالى تفى على لو جه خطبك حتى
وبعد ما حكيت لهم الحكايه دى ردو على وقالولى ايييييييييييييييييييييييي يه؟تلاقى أم حمدى دى مش شاطره بس عفاف ما شاء الله عليها
بصيت لهم كده وقلتلهم ربنا يهدى سبتو ايه للجهله والمتخلفين؟
معلش انا طولت قوى عليكو بس انا دمى محروق
ياريت بقى كل واحده مرت بموقف زى ده تدخل تقوله عل وعسى ناس زى دى تفوق وتوقف الجهل والدجل والشعوزة عند حدهم بقى
دلوقتى الشباب بيعملو ثورة ويغيرو التاريخ ودول لسه بيصدقوا عفاف


مواضيع قد تعجبك:

• قارئة الفنجان معارضة قارئة الفنجان
• هل تريد ان تكتب اسمك على شاطئ البحر او فنجان قهوه اوجوهره.....بالعربي وفي ثواني
• اتفضلي فنجان قهوه على كيف كيفك
• فنجان فرقاك من صدك تقهويـــــــــــته**
• تجميل فنجان قهوة

منتديات شبكة حياة - التعارف الترحيب المناسبات دردشة شات التهاني

[bint maghrib]

لا حول و لا قوة الا بالله العلي العظيم هاد شي سببو البعد عن الدين و اتباع سبل الشيطان لان النفس البشرية ضعيفة اما مغريات الدنيا ايضا نجد ان المسؤولين لهم دور في تفشي هده الظاهرة لمادا لا يحاربونها و يعاقبون كل من تسول له نفسه الاتجاه اليها و ممارستها