تجربة أحدى الآخوات مع (حماتها) تعالو وأتعلمو كيف

اشجان الحسن · 04-19-2013, 01:29 PM

تجربة أحدى الآخوات مع (حماتها) تعالو وأتعلمو كيف

تجربتى الشخصية مع حمااااااااااااااتى (رحمها الله رحمة واسعة)

أخواتى فى الله عجبتنى جدا فكرة الغالية فيونكة بخصوص التجارب الشخصية من واقع أيامنا وحياتنا تراجعت فى الأول لكن قولت لنفسى لعل أى حد يستفاد من تجربتى اللى بجد أتعلمت منها فحياتى أهم درس أنى محكمش على أى شخص ألا من خلال تعاملى معه شخصيا أنا مش هطول عليكم بس علاقتى مع حماتى كانت صدام لانى تصورت زى ما كل أقاربى قالوا وصديقاتى فحفل الخطوبة دى شكلها شديدة خدى بالك دى أم لصبيان طول عمرها يعنى جامدة والكلام اللى أنتم عارفينه ومن يومها بدأت أدقق فكل كلامها حتى لو كلام عادى وطبيعى طبعا باخده بحساسية عشان خايفة منها لتسيطر عليا زى ماسمعت منهم وأنا كنت لسه فى بداية حياتى ومعرفش أى حاجة برغم أن أمى الحبيبة بارك الله فعمرها قالتلى يا بنتى عمليها بما يرضى الله أكنك بتعملينى هترتاحى لكن كلام اللى حواليا وناس من عائلة زوجى خوفونى منها وقالولى شخصيتها صعبة حسيت أنى داخلة حرب مش هبدء حياة زوجية هادئة مستقرة ولما كنت أسال زوجى حفظه الله عن شخصية مامته وأنى خايفة من كلمة حماه يضحك ويقولى ماما بكره تعرفيها وتحبيها أكتر منى طبعا كنت بضحك وأقول فنفسى يمكن وفبداية زواجى عملت لنفسى حدود معاها خوفا من اللى سمعته ولقيتها بتتقرب ليا بطريقة غير مباشرة وقالتلى أنا نفسى أسمع منك كلمة ماما هتكون أحسن من طنط طبعا ده شئ عادى ومن حقها لكنى قولت أحنا بدأنا لكن سبحان الله لقيتها بتقولى أنا طول عمرى كان نفسى يبقا عندى بنت وحاسة أن ربنا عوضنى بيكى ياريتك تكونى حاسة بكده مش أنى حماتك أستغربت وسألت صديقة ليا سامحها الله كانت متزوجة قالتلى ما هما فالأول كده عشان تخليكى تشتغلى عندها بعد كده غسيل وكنس و.... قولتلها بس حسيت أن كلامها غلط وسالت ماما قالتلى يا بنتى حماتك طيبة بس أنتى اللى خايفة منها مش عارفة ليه ابدئى بالخير وشوفى وفعلا روحت زورتها والله شوفت الفرحة فعينها مبقتش عارفة تعملى إيه روحت بوستها وقولتلها حقك عليا قالتلى ليه ضحكت قالتلى أه أنتى كنتى خايفة منى ولا يهمك عارفة يا رضوى أنا فرحانة بيكى ليه عشان حاسة أن ربنا عوض صبرى خير طول عمرى نفسى لما أموت محدش يشوفنى وأنكشف عليه عوزاكى أنتى تاخدى بالك منى طول عمرى شايله هم الموضوع ده دلوقتى مش خايفة منه لانك معايا ونزلت دموعى لاول مرة ياااااااااااااه معقول أنسانة بالطيبة والحنية دى كلها وأنا اللى كنت وحشة كده طبعا مانا سمعت كلام الغير ومسمعتش كلام نفسى ولا كلام أقرب الناس ليا أمى ومن يومها عشت أجمل أيام حياتى وكانت الضحكة متخرجش من قلبى بجد إلا وأنا معاها ربنا يرحمها ويغفرلها تصوروا قبل وفاتها بشهرين كانت نفسيتى تعبانة جدا لانى أتاخرت فالحمل تلت سنين قالتلى إن شاء الله ربنا هيرضيكى وبكره تقولى ماما نعمة قالت دأنتى حطة رجليكى فالآرض بالدنيا متشغليش بالك ومن كتر حبى ليها زوجى بقا يغير ويقولى أحنا هنفضل هنا على طول مش هنروح كنت أغلب وقتى معاها لدرجة أنى كنت مرافقة معاها فالمستشفى مكنش حد مصدق أنها حماتى الكل فاكر أنها أمى وهى فعلا كانت نعم الأم ويوم وفاتها كان يوم الآثنين وكنت صايمه سبحان الله محدش وقف على غسلها غيرى أنا وبنت أخوها زى مكانت عايزه وقرأت لها سورة الملك لانها كانت بتحبها جدا وأخر عهد ليها بالدنيا جبتنى وقالتلى نفسى تقرأى ليا سورة الملك قبل وفاتها بيومين أنا طولت عليكم معلش حاولت أختصر على قد ما أقدر بس والله ربنا يشهد عليا أن دعواتها ليا لحد النهاردة سمعاها فودانى وحاسة أن ربنا بيبارك ليا بسببها والمفاجاة أن ربنا أكرمنى بحملى الآول بعد وفاتها بشهرين بالضبط من غير دكاتره لحد النهاردة مش قادرة أنسى طيبتها وحنيتها عليا عارفين فالعزاء جارة لحماتى جت جمبى كنت منهارة بجد أول مرة أشوف حالة وفاة وأقف على غسل وأحضر جنازة أحداث غريبة أول مرة تمر عليا لقيت جيران حماتى رحمها الله بيقولوا والله عمرها مقالت مرات إبنى كانت دايما تسميكى هدية الرحمن وهى بتتكلم عليكى معانا ياااااااه معقولة القلب الطيب الجميل اللى كنت عايشه معاه ده وأنا مش عارفة بس الحمدلله أن ربنا سبحانه وتعالى رجعنى لنفسى فبداية الطريق وعشت معاها أجمل أيامى اللى مش ممكن أنساها

صدقونى تجربتى مع حماتى علمتنى مسمعش لكلام الناس مخدش بالظاهر الله أعلم بالباطن مش أنا الحكم ربنا سبحانه وتعالى أعلى وأعلم بالنوايا أتعلمت أنى أظن الخير دايما والباقى على الله

معلش للإطالة بس حبيت أشاركم معايا لعل حد يستفيد

مع الشكر للغاليه (بالقرأن نحيا صاحبة الموضوع)

مواضيع قد تعجبك:

منتديات شبكة حياة - المجلس العام

اشجان الحسن · 04-19-2013, 01:35 PM

الله يرضى عليكى يا رضوى وتسعدى فى الدارين فى الدنيا والاخره

وكأنك تحكى عنى بجد لكن الفرق ان حماتى شالت عيالى كلهم
وكانو عندها اغلى الغاليين طبعا ولاد الغاليين بيبقو أغلى كمان
بارك الله فيكى وان شاء الله ليسه ربنا شايل ليكى حجات حلوه كتير بسبب رضاها عنك
ربنا يرحمهم جميعا ويدخلهم فسيح جناته
وكانت دعوة حماتى ليه تنسترى فى الدنيا والاخره
ويخرجنا من هذه الدنيا على طاعه اللهم أمييييييييييييييييييين
وكمان وقفت على غسلها وكانت أول مره ليه اقف على غسل مع بنتها ..هى ليها بنتين واحده كانت فى الحج فى وقت الوفاة رحمها الله هى الاخرى من أطيب الناس
ورحم جميع موتانا وموتى المسلمين..