منتديات شبكة حياة

منتديات شبكة حياة (http://www.hayah.cc/forum/)
-   عالم الحياة الزوجية و المعاشره (http://www.hayah.cc/forum/15/)
-   -   قصتي وأبي حل لعل الله يفك بحلولكم همي (http://www.hayah.cc/forum/t156981.html)

ريتال 2 06-10-2015 11:47 AM

قصتي وأبي حل لعل الله يفك بحلولكم همي
 
مشكلة وابي حلها منكم كأخوات لي في الله جمعني الله واياكم تحت مستقر رحمته

اعتذر للأخطاء الإملائية

أنا متزوجة من شاب خليجي طبعا أنا اجنبية وكان لي مكانتي عند أهلي وتجارتي الخاصة وتركت تجارتي لأن كان فيها مخاطبة العملاء من الرجال
المهم تزوجت ويوم زواجي قام ولد خالتي صغير بالسن بتصويري بجوال أمه وانا على الكوشة وفجأة أخت زوجي سحبت الجوال منه وكل الحضور كانوا يهدون فيها وهي بأعلى صوتها تهاوش وتقول الجوال يسلم إلى يد الرجال وفعلا طلعوا الجوال لرجالهم خارج القاعة تخيلوا وفيه صور أمه وخواته وبدل ما الأم تهدي الموضوع بالعكس وقفت مع بنتها هي وحريم عيالها وجاراتها وأنا اهلي بس يهدون فيهم لأنه عيب عندنا الهواش والمشاكل بالمناسبات ومن يومها اختفى الجوال
وثاني يوم اتصل فيني زوجي يقول اتصلي في أختي وكل أهلي وأعزميها عندك يعني اعتذار غير مباشر لها مع انه هي السبب وجدا جدا هداها الله شايفين نفسهم علي وعلى أهلي وعزمتهم وسويت عزيمة لهم سمع بيها القريب والبعيد
المهم وفي أول أيام شهر العسل شفته يكلم بجواله وتجيه اتصالات باخر الليل وفجأة أكتشف ان اللي يكلمها خويته اللي من 11 سنة وفتحت جواله إلا واشوفها مرسلة له صورها المخلة والخليعة ويوم واجهتهم اثنينهم هو بالبداية أنكر حلف على كتاب الله انه مايكلمها ووقت واجهته بالصور اعترف وحتى بيوم زواجي كان يكلمها ومبين انهم متفقين انه ماينزف معاي وفعلا كنت أحاول فيه وحنا بالقاعة وهو رافض وبشدة انه ينزف
المهم واتصلت في خويته واعترفت لي بكل شيء من اول ايام زواجي كل يوم يطلع من البيت يكلمها ويذم فيني أنه هي تقول له وش تبي فيها أجنبيه قال لها انا مضطر عشان اسكت أبوي وأمي لتأخري بالزواج فأضطريت أسكتهم واتزوج هالأجنبية طبعا هو عمره 30 سنة غير الكلام اللي سمعته حتى ذمه لي في المعاشرة الزوجية واللي يقهر زيادة كان يقول لها اتصلي بأي وقت زوجتي غلبانه ماتفهم شي ولا تطلب مني شي كتسوق وماديات
غير كذا انا قسم بالله أجمل منها وقبيلتي اشرف منهم الاثنين
وطبعات لا تمشيات ولا كلام غزل والله والله اني جميلة ولله الحمد وشيك ولبسي أنيق وفوق هذا كله مادلعني الدلع اللي كان مدلعة خويته من طلعات وروحات وجولات ويبلسها افخم الماركات ومصروف شهري لها لا يقل عن 6000 الاف وكل هذا وغيرته الشدييييدة بشكل لا يوصف يغار علي اكثر من اخواته بحكم انه يقول كل شي ملفت فيني وانا ماعتقد كذا غير إنه شكاك وغيور جدا حتى عباتي وشكلي الخارجي يوم اطلع من البيت بكيفه
وتصبرت وفي يوم من الايام كان أهله خارج المملكة يزورون جماعة لهم وكنت يوميا اخذ شغالة مامي وروح لبيت اهله وننظف ونكنس ونمسح البيت بالرغم من ان حريم عيالها بنفس الحي اللي فيه البيت الا انهم ولا يفكرون يروحون يهتمون وينظفون
وبعد كم يوم ورحت لهم وأنا عروسة بنفس الدولة وكان استقبالهم لي جدا عادي حتى جماعتهم بنفس الدولة ما يدرون اني موجودة جلست معهم تقريبا شهر ورديت للمنزلي واتفاجأ ان بنت خالهم زارتهم وهي متزوجة معاي بنفس الشهر وسوو لها عزيمة وحفل واعتبرت الموضوع عادي وانتظرتهم الين رجعوا للدولتهم ورحت المطار استقبلتهم لبيتي وفاجأتهم بأكبر حفل وهدايا ومن طبعهم العروسة يعزمونها بكل بيت على ذبايح وانا ابد لا والله مابي منهم شي وبنعمة من الله ولكن اتسائل عن السبب في التفرقه

زرت وحدة منهم والله والله على فشار وشاي
والثانية قهوة وحلا انا جيابته وكل أهله ماقدر اخذ راحتي معهم بالكلام يزعلون من اتفه شي وكل كلامي معهم فيه تكلف وحتى لو بالمزح طلعت كلمة تقوم القيامه وصار قبل كم يوم من والدته هداها الله واحرجتني وانا امزح حتى بنتها قامت تداري الموقف وتبرر لها كلامي وموقفي

ويوم يزوروني اطبخ العشاء بجميع الأصناف والأطباق

المهم بعد كم شهر تأخرت بالإنجاب ورحت المستشفى وهنا جات الطامة الكبرى ولله الحمد زوجي عقييييييم ودخلنا في مرحلة علاج واطفال انابيب وفشلت عمليتي ولله الحمد اللهم صبرني على مصيبتي واخلفني خيرا منها ومريت بمرحلة أسأل من هو على العرش استوى مايري أي مسلمة أوجاع هالعملية وأمه كانت شايفة حالتي يوم كامل صراخ وكنت اقول له هذي سكرات الموت من قوة الألم
المهم دايم ازور أهله واقوم بالواجب اللي يكلفني فوق طاقتي حتى ولكن للأسف جدا شايفين نفسهم وخاصة أم زوجي وكم وحدة من بناتها حتى يتكلمون بالماركات وانا على نيتي اقول لهم اللي بقلبي وعن ملابسي انها ماهي بماركات ولكن والله اني اروع منهم حتى هم ملاحظين هالشي
والبعض من قريبات زوجي دايم يبون يزوروني وانا اعتذر لأنه اطفالهم يعفسون البيت يكبون العصيرات ويلعبون في المطبخ والله حتى دولاب غرفة نومي يفتحونه ويكبكبون اللي فيه وأنا من طبعي مثل ما تربيت النظااااافة والترتيب يعني ماشاء الله لا قوة الله بالله اللي يدخل بيتي يقول مستشفى من نظافة وتعقيم وتعطير الأجواء حتى دولاب زوجي مافي قطعة من ملابسة إلا مكوية ومعطرتها ومبخرتها بدولابه شعري يتكلمون عليه انه موصل ومو بشعري الحقيقي
وهذي بعد سببت مشكلة واتفقوا علي كلهم اصبحت المنبوذة بينهم لأنه اعتذر لهم اني خارج البيت عشان ما ابيهم يزوروني وغير كذا انا امر بوضع نفسي جدا صعب تخيلي طول عمرك تحلمين انك تكوني أم وتسمعين احلى كلمة ماما وفجأة تعيشين بوحدة موحشة تسمعين اصوات اطفال الجيران يلعبون يبكون ويضحكون
اقسم بالله العظيم اني صرت احلم دايما بالأطفال وأفز من نومي ادورهم بالبيت واخر مرة حلمت بطفلة جميلة وكنت اتأمل ملامهحا واقول سبحان اللي خلقها أخذت من جمالنا الاثنين وفجأة فزيت ابكي وأدورها وماستوعبت إلا وأنا بالصالون .

وإلى الان اهله مازارو اهلي ابد غير مرة وحدة واختي أجري لها عملية خطيييرة جدا ولا يسألون ويتصلون أبد ويوم اجتمعت معهم مامي اطالع في أمه إلا وهي عافسة وجهها وما تاخذ وتعطي مع مامي وكأن اللي جنبها حشرة مو ادمية
وحتى اهله الى اليوم مامنهم احد عزمني ببيته ومن ناحية الهدايا والله ان أمه تهدي حريم عيالها الهدية بالألف والألفين والثلاثة وانا اقسم بالله شرت لي عقد ما يكلف 15 ريال وفستان ب20 ريال رغم كل طيبتي وواجبي معهم بالرغم من مستواهم المادي جدا ممتاز الله يديمه عليهم وزوجة أحد اخوانه اهدتني لزواجي ملابس مستخدمه تخيلو مستخددددمة يالعالم وحزت بنفسي وامه دايم تحكيني وش شرت لحريم عيالها من ذهب هدية زواجهم من اطقم وكامل ملحقات العرس شي يفوق الوصف
غير أمه اللي اجلس معها وأهمز رجلها لو هي مريضة ولو تعبت اخذها المستشفى ولو طالعين سوق أمرهم يعني عكس حريم عيالها اللي يقربون لها نهائيا حتى لو قامت بتلبس نعولها اقوم من مكاني اصف لها الجزمة اليمين ليمينها واليسار ليسارها اكرمكم الله ابي الأجر والبر من الله سبحانه
أخير بعد إطالة قصتي هل استمر معهم بنفس هالطيبة والسذاجة ولا شو
والله ان أبو زوجي يموت فيني ويهاوش علي ما يرضى علي أبداً عكس أمه اللي توقف حتى مع حريم عيالها ضدي بالرغم من معاملتهم السيئة لها
مايقدرون اني محرومة من زينة الحياة الدنيا والسبب من ولدهم كل ماشفت طفل اتعذب وأرجع بيتي انتحب من البكاء
اصبحت ماتشيك ولا البس ولا حتى اتمكيج ولا صحبات وطلعات حتى أهلنا ما ازورهم بسبب النفسية وأمه اللي تتكلم من طرف خشمها والله مايعرفون يلبسون ولا يطبخون وانا اصبحت مشهورة بطباخي في عيلتهم
وقريب زوجي من البداية قال له احذر على زوجتك ترى راح يتكالبون على زوجتك لانها اجنبيه وزوجي أول شاب بالقبيلة يتزوج من خارج العيلة
والله يابنات اهلي هم اللي يحزون علي على نيتهم وطيبين حتى ماماي يوم تتكلم مع امه احس فيها بإنكسار وخجل وضعف لأنها مرت بتعب في التربية ومشاق الحياة وحدها اصبحت ضعيفة الشخصية
وأمه عاشت على العز والنعيم والدلع
هاليومين كل اللي كتبته بقصتي انفجرت وصارحت زوجي فيه من حر قلبي على نفسي واهلي حتى هو رغم اللي صدر منه احزن عليه يوم يمزح معا أمه ويذكر لها أي موقف مني ولا من خواتي يبي يضحكها والله ماتضحك ولا حتى تطالع فيه وهو يحكيها والبارح فجأة تهاوشت معه وركلت ملابس أمه برجلي في الارض وكسرت عقد أمه اللي ب 15 ريال اعزكم الله كنت في نفسية جدا صعبه وتزيد حالتي كل مافتكر انه ماراح اسمع كلمت ماما ولكن أملي بالله الذي لا يعجزه شيئ في الأرض ولا في السماء وهو السميع العليم
واخيرا اعطوني المشورة انا ماكملت سنتين من زواجي ونفسي مكسورة من كل شي ومتصبرة بالرغم من تدني وضعه المادي بسبب صرفيات العلاجات وتوه طالع من صرفيات زواج فأصبحت أنا اوقف معه ماديا لانه يقول مايتبقى شيء اخر الشهر من الراتب وحتى بيتي إلا الان ماقدرت اعزم اهلي فيه لأنه غير مؤثث وأهله مايفكرون يوقفون معه سبحان الله يوم افكر في مامي ووقفتها معنا ومع خواني يوم تزوجوا قبل سنوات وكنا نمر بظروف مادية إلا انها عملت المستحيل معهم وماقصرت معهم بشيئ أنا بعض تأثيث بيتي من أثاث أهله المستخدم حتى المواعين اللي جاتني من أمه كم طقم والبعض منها ناقص يعني مبين انه مستخدم وكل مايصير عنهم شي اقوم بالواجب وهو يقولي اتصلي وزوري وأسألي حتى في اتفه الأمور
ويوم يحصل اي شي عند أهلي مايفكرون يرفعون اتصال عليهم حتى في عملية اختي
انا الان قطعت زيارتي بهم مو مره بعض الشي ما ابي اقطع صلة الرحم ولا ابي ازعله لانه ترك علاقاته وتدين والله ويتحمل صوتي وبكائي وعصبيتي اللي دمرت نفسيتي زياده


miss rania 06-20-2015 11:13 PM

رد: قصتي وأبي حل لعل الله يفك بحلولكم همي
 
انتى ليه ما تطلبى الطلاق بما انه خاين و معاملتهم ليكى و لاهلك مش لطيفة

عديلاا 08-25-2016 10:46 AM

رد: قصتي وأبي حل لعل الله يفك بحلولكم همي
 
الله يهدي البال وو الخيانة ما ينسكت عليها خاصة لو كانت متكررة و بدون اسف او ندم منه
استخيري الله في الطلاق


الساعة الآن 07:00 PM.

Powered by vBulletin® Version 3.8.7
Copyright ©2000 - 2024, vBulletin Solutions, Inc.
Content Relevant URLs by vBSEO