قصة اختنا الحبيبة مدام تلاجه

اشجان الحسن · 01-21-2013, 10:11 PM

السلام عليكم ورحمة الله وبركاته

السلام عليكم ورحمة الله وبركاته

اخواتي الحبيبات حبيب احكي لكم على حاجة عملية حصلت لاخت حبيبة معانا هنا وهي الي طلبت مني اني احكيها لكم حفاظا على خصوصيتها

اقروها يا بنات حلوة اوي وأثرت في اوي اوي قصة اختنا الحبيبة

مدام تلاجة

لان ربما تفيد ويارب تكون في ميزان حسناتها

بتقول اختي الحبيبة ان زوجها ربنا يصلح حاله وحالنا جميعا من النوع الصعب جدا ارضاؤه لسبب بسيط هو انه انسان مستفز جدا في كلامه

وطبعا كلكم متخيلين كم المشاكل الي ممكن تحصل مع كل
كلمة يقولها

حبيبتي بتقول انها شافت الافكار الي احنا عاملينها في موضوعنا ده وبينها وبين نفسها ضحكت وقالت دي ممكن تنفع مع اي حد غير جوزها وممكن تبقى افكار وردية وهي عجباها لكن اكيد مش هاتجيب ولا نتيجة في حالتها

وبعدين قالت طيب هايحصل ايه لو جربت ؟؟؟؟؟ هو انا هاخسر ايه يعني ماهي المشاكل كدة كدة مستمرة أيه الي هايزيد ؟؟؟؟

بتقول انها عملت خطوة بسيطة اوي انها بدأت تعمل شوية تغيرات في نفسها وفي البيت وفي الاكل وطبعا ده ما كانش فارق معاه أوي او هي تخيلت كدة في الأول

وبدأت حبيبتي ترد على استفزازه في الكلام بأنها تقلب الموضوع لهزار يعني مثلا بيقولها كل ما اشوفك الاقيكي بتاكلي دا انتي بقيتي شبه التلاجة من كتر الاكل وبتقول طبعا دي مبالغة كبيرة منه بس هو ده طبيعة كلامه هي بقى كانت بترد على كلامه ده زمان بعنف وتزعل جدا وتعيط وتصعب عليها نفسها وطبعا تقوله كلمتين يوجعوه هو كمان زي ما وجعها

قالت انا هاغير شوية واقلب الموضوع ازاي ؟؟؟؟ تقوله فعلا يا حبيبي لازم ابقى تلاجة يعني هو البيت يبقى نار وكبريت بس الله انا تلاجة فعلا احلى تلاجة اه انا مدام تلاجة مرات الاستاذ بوتجاز !!!!!!

طبعا بتقول الموقف بيتقلب بهزار ويضحكو هم الاتنين وحتى لو ماردش عليها او قلب شفايفه كدة في استغراب هي بتحس ان حالة الاستفزاز عدت بسلام وما حصلتش المشكلة المعتادة

هي طبعا دي الخطوة الاولى الي بقت تعملها وبتقول انه فعلا بدأ يقلل من الكلام المستفز لانه حس انه لا يمثل لها شيء

وبتقول الجميل انها عرفت كمان في لحظة ما يحصل مشكلة ويقولها كلام جارح انها ماتردش ابدا وده جديد عليها لانها كان مع اي كلمة منه جارحة كانت بتردها عشرة عشان كرامتها وعشان ما يزودهاش معاها

اتعلمت انها تسكت وترسم على وشها كلام كتير يحسسه بغلطه وبزعلها الكبير منه بتقول بقى المفاجأة الي هي في منتهى السعادة عشانها انها لاقيته كان بييجي يصالحها ويقول لها ماتزعليش ودي عمرها ما حصلت منه قبل كدة

وان آخر حاجة حصلت منه وكانت بردو جديدة جدا جدا عليها انه بيتصل بيها من الشغل يصبح عليها ويقولها كلام حلو لدرجة بتقول امبارح كانت اول مرة اسمعه في المكالمة وهي بتقوله عاوز حاجة يا حبيبي رد عليها ودعا لها وقالها ربنا يكرمك لا يا حبيبتي مش عاوز حاجة ربنا يخليكي لي ياسكرة

بتقول قفلت السماعة وانا دايخة والله دايخة وقلبي بيرقص مين الي بيتكلم ده جوزي صحيح ياه من امتى ما سمعتش كلمة حلوة من امتى ما شوفتوش بيدعي لي أدامي يارب انا فرحانة اوي اوي

بتقول طبعا طرت على المطبخ اجهز له كل الاكل الي بيحبه وخليت البيت بيلمع وانا منتظرة حبيبي الغالي لما يشرف وينور البيت

ده كلامها بالظبط اعتقد ما ينفعش فيونكة تقول ولا كلمة غير

ربنا يسعدكم يا رب ويزيد الحب والتفاهم والاحتواء والتعاطف والكلمات الجميلة بينكم وتتملي البيوت كلها حب وسعادة يا رب

بحبكم في الله